Bizikletaren Aldeko Estatuko Estrategia bizikleta arlo guztietan bultzatzeko helburua duten ekintzen bilduma da. Gobernuak onartu zuen 2021eko ekainaren 8ko Ministroen Kontseiluaren bileran. Estrategia horren inplementazioa koordinatzea Garraio eta Mugikortasun Jasangarriko Ministerioari badagokio ere, estrategiak aurreikusten dituen ekintzak, zeharkakotasuna dela-eta, administrazio publikoaren hiru lurralde-mailei dagozkie, baita sektore zibileko, profesionaleko eta akademikoko erakundeei ere.

Estrategiaren testuak bost lehentasun estrategiko ezartzen ditu:

• Mugikortasun jasangarria sustatzea bizikletaz egindako garraiobideen bidez.
• Mugikortasun aktiboaren bidez bizimodu osasungarria sustatzea.
• Zikloturismoaren potentziala aprobetxatzea.
• Bizikleta bidezko aisia eta kirola sustatzea eta babestea.
• Bizikleta bultzatzeko Estatuaren ekintza koordinatzea.

Bizikletaz egiteko Espainiako ibilbideen bistaratzailea funtsezko tresnatzat hartzen da erronka horiek lortzeko, eta haren helburua da kalitatezko informazioa ematea, erraz iristeko eta interpretatzeko gure herrialdean dauden hiriarteko bizikleta-ibilbide nagusiei buruz. Ibilbide horiek eguneroko mugikortasunerako erabil daitezke, baita aisialdiko txirrindularitzarako edo zikloturismorako ere. Bistaratzaile honek eskaintzen duen informazioari esker, pertsona bakoitzak bere gustu, behar eta gaitasunari ondoen egokitzen zaion ibilbidea aukeratu ahal izango du. Horrela, gero eta errazagoa eta seguruagoa izango da bizikleta nahi duen edonork erabiltzea.